A Junioren - 6 Spiel - 6 Sieg - 18 Pünkt = Ufstieg

Eusi A Juniore hend sich hüt am 10:30 im Juchhof 2 troffe zum ihres 6. spiel gege de dritt Platzierti Centro Lusitano de Zurique zbestriite. Was keine gwüsst het, es chönt für alli en schöne suntig werde, meh dezue spöter:

In bekannter Manier hend sich eusi A Juniore hüt im Juchhof mit 18 Spieler 1.5 Stund vor Spielbeginn troffe. De Fokus isch klar uf 3 Pünkt gsi zum i de Tabelle es Statement setze.

Nach de 1. Halbziit isch nacheme Goal vom Nico Bucher 1:0 gstande.

En sehr guete spielerische Uftriit vo eusne Jungs jedoch hett d'Effizienz vorem Goal zwünsche übrig lah.

S'Trainerduo, Toni & Ale, hend sich entschiede de Topscorer vo de Aktive, Robin Wick, sowie de Laurin Gantebein ihzwechsle.

De Laurin het nach 2 Minute am Trainerduo bewiese, dass er eigentlich vo Ahfang ah hett sölle spiele und zum 2:0 ihgnetzt.

De Wick het hüt sin Spitzname "Zauber Wick" unter Bewies gstellt und innert 20 Minute en lupereine Hattrick gschosse. Bim stand vo 5:0 hett denn de Noel Matthys nacheme Eckball nurno zum letschte Goal & 6:0 müesse sin Zucker-Linke anhebe.

D'Freud vom Team het sich in Grenze ghalte und dementsprechend isch s'Garderobefoti entstande...

Ca. uf die 14:15 hend sich 5-7 Spieler vo eusem Team entschiede sich uf de weg in Richtig Klote zmache und euses "eis" go unterstütze.

Am 15:20 bim Stand vo 0:3 für euses "Eiis" hend de Toni & Ale erfahre, dass de Erst- und dä Zweitplatzierti bi de A-Juniore ufstiigt!

Nach einige Berechnige und Blick uf d'Tabelle sowie Reglement vom FVRZ isch klar gsi, dass eusi A-Juniore bereits 2 Rundene vor Schluss als Ufstieger id Promotion feststönd!

Dementsprechend isch d'Kommunikation in Richtig Sportchef und Präsident gange! Euse Masseur vom 1 het au mitglosed, jedoch nur das wo er het welle... und zwar Ufstieg, aber dass d'Kommunikation gegenüber em Team erst am Ziistig im Training stattfindet, nöd.

Jetzt wieder zum Ahfang vom Blog:

Nachem WC-Gang sind eusi Trainer vo de eigete Spieler druf ahgsproche worde, obs no öpis verzelle müssed?! Antwort miteme lache im gsicht: "nei wieso??"

Prompt: " de Heinz (euse Masseur im 1) het eus zum Ufstieg gratuliert, will die erste 2 ufstiiged, fröged eui Trainer"

Druf abe isch en Pizza & Bier-Sunntig mit Wasserschlacht uf heimischer Huebwiis organisiert worde! S'Lied "campeones campeones oeoeoeoe" isch nöd gloffe, will euses A uf 8 Spiel 8 Sieg und Platz 1 use wott!

Herzlichi Gratulation a euses A zum Ufstieg id Promotion und viel Erfolg i de letzte 2 Spiel um Platz 1!

Über Unterstützig a de Siitelinie würed sie sich freue!